Ambasada Amerikane do të kushtojë 215.5 milionë dollarë

Shteti Amerikan ka njoftuar botërisht për ndërtimin e ambasadës së re në Kosovë.

Një ditë pas vënies së gurthemelit për ndërtimin e Ambasadës Amerikane në Kosovë, në web faqen zyrtare të Departamentit të Shtetit u publikua njoftimi. Në të thuhet se Ambasada Amerikane do të ndërtohet si simbol i qëndrueshëm i miqësisë me Republikën e Kosovës.

Njoftimi jep detaje rreth ndërtesës së ambasadës e cila do të shtrihet në 5 hektarë tokë në Prishtinë. Ambasada do të përfshijë një kancelari, një vendbanim të Trupave të Marinës Amerikane, një ndërtesë kryesore për shërbime dhe vendqëndrimet për stafin e ambasadës.

Ky projekt do të kushtojë 215.5 milionë dollarë, transmeton Klan Kosova.

Departamenti i Shtetit njofton se shumica e punëtorëve do të jenë kosovarë.

Byroja arkitektonike që do të dizajnojë kompleksin e ambasadës do të jetë Davis Brody Bond nga New York, kurse ndërtuesi do të jetë Harbert International of Birmingham nga Alabama.

klankosova.tv

*Klikoni KËTU për t´u bërë pjesë e kanalit zyrtar të Klan Kosovës në Viber.

*Klikoni KËTU për ta shkarkuar aplikacionin e Klan Kosovës në Android, dhe KËTU për iOS.