30 ditë paraburgim për burrin që kanosi postierin e gjykatës në Prizren

Gjykata Themelore në Prizren, ka njoftuar se të dyshuarit me inicialet F.H. i është caktuar masa e paraburgimit prej 30 ditësh sepse ka kanosur postierin e gjykatës.

Ai, sipas gjykatës, ishte i përfshirë në vepra të ndryshme penale në të kaluarën dhe këto e arsyetojnë, siç thuhet në njoftim, dyshimin se me qëndrimin e tij në liri, mund të përfundoj veprën, transmeton Klankosova.tv.

“Më datë 21 janar, në orët e mesditës në Prizren, seriozisht e kanos personin zyrtar, i cili ishte në detyrë zyrtare, se do ta privojë nga jeta të dëmtuarin – punëtorin e gjykatës, në atë mënyrë që derisa i dëmtuari ishte në orar të punës në pozitën e dorëzuesit të postës së gjykatës, e takon të pandehurin të cilin e njofton zyrtarisht se djali i tij duhet të paraqitet në gjykatë, për të cilin ka një ftesë, të cilën ftesë ia ofron të pandehurit, mirëpo ky i fundit i revoltuar, fillimisht tenton t’i vërsulet fizikisht, pastaj e ofendon me fjalë fyese dhe pastaj, i drejtohet të dëmtuarit me fjalët kanosëse “kam me ju vra edhe ty edhe gjyqtarët nëse bjen kësi letra”, me ç ’rast të dëmtuarit i shkakton frikë, ankth dhe pasiguri.” Thuhet në njoftimin e gjykatës.

Tutje, bëhet e ditur se në fazat e mëtejme të procedurës penale do të vlerësohet se a do të argumentohen këto fakte.

“Me rastin e caktimit të paraburgimit, Gjykata ka marrë mënyrën dhe rrethanat në të cilat është kryer vepra penale, ku i pandehuri dyshohet se ka kryer formën më të rëndë të kualifikuar pasi që ka kanosur personin zyrtar, gjatë ushtrimit të detyrës zyrtare dhe lidhur me ushtrimin e detyrës zyrtare duke e kanosur me jetë të dëmtuarin.”

Derisa paraburgimi do të llogaritet  prej kohës së arrestimit 21.01.2022 dhe mund të zgjasë deri më datën 21.02.2022.