​Bosch: Kosova nuk fiton asgjë me refuzimin e Gjykatës Speciale

Ambasadori Bosch se kjo çështje mund të kalojë në kompetencë të Këshillit të Sigurimit të Kombeve të Bashkuara, gjë që do të mund të jetë shumë e rrezikshme për imazhin e vendit më të ri evropian.

“Për Gjykatën Speciale duhet të votohet këtu. Nëse asaj i thuhet ‘jo’ këtu, atëherë kjo çështje do të transferohet në kompetencë të Këshillit të Sigurimit të OKB-së. Ky mund të jetë një rrezik shumë serioz. Ju nuk do të mund të fitoni asgjë me refuzimin e Gjykatës Speciale, përveç Tribunalit të OKB-së për krime lufte”, ka thënë Bosch.

Ai ka shtuar se së shpejti në Prishtinë pritet të arrijë një ekip nga Brukseli për të negociuar përmbajtjen e dokumenteve që duhet të adoptohen nga Kuvendi i Kosovës lidhur me themelimin e Gjykatës Speciale.

Ajo që deri më tani dihet, sipas Bosch, është që Gjykata Speciale do të duhej të jetë e përbërë tërësisht nga prokurorët dhe gjykatësit ndërkombëtarë dhe se ajo me stafin e vet në tërësi do të vendoset në Holandë.

Bosch ka thënë se EULEX “ka kryer punë të mirë në Kosovë” dhe se mandati i tij skadon nga mesi i vitit të ardhshëm.

“Ende mbetet të shihet dhe të negociohet formati i asistencës së ardhshme të BE-së për Kosovën në fushën e sundimit të ligjit. Disa elemente të tanishme të misionit nuk do të jenë të nevojshme në të ardhmen, por disa sikurse gjykatësit apo prania e policisë në veri të vendit sipas të gjitha gjasave do të vazhdohen”, ka thënë ai duke shtuar se “EULEX-i sipas të gjitha gjasave do të ekzistoj me emër tjetër dhe me mandat më të kufizuar.”

Këto komente ambasadori holandez i ka bërë një një ligjëratë para studentëve të Kolegjit ISPE.

*Klikoni KËTU për t´u bërë pjesë e kanalit zyrtar të Klan Kosovës në Viber.

*Klikoni KËTU për ta shkarkuar aplikacionin e Klan Kosovës në Android, dhe KËTU për iOS.