13:46, 13 Shkurt 2018

Presidenti i Shteteve të Bashkuara, Donald Trump, i tha homologut rus, Vladimir Putin, se “tani është koha për të punuar drejt paqes së qëndrueshme” midis Izraelit dhe Autoritetit Palestinez, njoftoi Shtëpia e Bardhë.

Trump i bëri komentet në një bisedë telefonike me Putinin, ndërsa ky i fundit takoi në Moskë udhëheqësin palestinez, Mahmud Abbas.

Putin tha se bisedimet me Abbasin janë përqendruar në gjetjen e një “qasjeje të përbashkët”, për të kapërcyer dallimet midis Izraelit dhe palestinezëve.

“Situata është larg asaj që duam të shohim”, tha Putin, duke shtuar se ai “gjithmonë e ka mbështetur popullin palestinez”.

Shtëpia e Bardhë tha se Trump, në bisedë me Putinin, ka theksuar edhe rëndësinë e marrjes së hapave të mëtejshëm për të siguruar de-nuklearizimin e Koresë së Veriut.

Trump është ankuar vazhdimisht se Rusia nuk po bën sa duhet për të detyruar Phenjanin që të heqë dorë nga armët bërthamore, përmes sanksioneve të rrepta ekonomike.

Në një intervistë për agjencinë Reuters, muajin e kaluar, Trump ka thënë se Rusia po e ndihmon Korenë e Veriut që t’iu shmanget sanksioneve të vëna nga Këshilli i Sigurimit i Kombeve të Bashkuara. “Rusia nuk po na ndihmon fare me Korenë e Veriut”, ka thënë Trump.

Gjatë bisedimeve në Moskë, Abbas tha se palestinezët nuk mund të pranojnë më vetëm SHBA-në si ndërmjetësuese në negociatat me Izraelin, pasi Trump, më 6 dhjetor, e ka njohur Jerusalemin si kryeqytet të Izraelit dhe ka bërë publike planet për të zhvendosur ambasadën amerikane atje.

 

Interesante