8:22, 17 Prill 2018

Komisioni Evropian do ta publikojë sot në Strasburg, Raportin e Progresit për vendet që synojnë integrimin në Bashkimin Evropian.

Ky dokument është pjesë e paketës vjetore të zgjerimit të Bashkimit Evropian ku pritet të tregohet përparimi që kanë bërë vendet e Ballkanit Perëndimor dhe Turqia, në rrugën e tyre drejt anëtarësimit në BE.

Anëtari i Komisionit të Punëve të Jashtme të Parlamentit Evropian, Eduard Kukani, ka deklaruar se Kosova, ashtu si Bosnjë-Hercegovina nuk duhet të presin raporte pozitive nga Komisioni Evropian këtë vit.

Sipas tij, sundimi i ligjit dhe aspekte ekonomike të vendit janë ende nën një pikëpyetje të madhe, ndërsa normalizimi i marrëdhënieve me Serbinë është në stanjacion, me shkallëzime të herpashershme dhe tensione në të dyja palët.

Komisioni Evropian beson se reformat në Kosovë janë ngadalësuar në sajë të periudhës së zgjedhjeve vitin e fundit në Kosovë.

Në Raportin për Kosovën theksohet se ngecja e reformave, konstituimi i vonshëm i Kuvendit dhe i Qeverisë. Po ashtu jepen kritika të ashpra për tentimin për shfuqizimin e Gjykatës Speciale.

Ndërkohë, aty përshëndetet ratifikimi i Demarkacionit me Malin e Zi, si dhe angazhimi më i madh në luftimin e korrupsionit e të krimit të organizuar.

Megjithatë, Komisioni Evropian u bënë thirrje institucioneve të Kosovës që të punojnë më shumë në luftimin e krimit dhe të korrupsionit.

KE thuhet se do t’i rekomandojë Bashkimit Evropian që të nisë negociatat për anëtarësim me Shqipërinë dhe Maqedoninë. Sa i përket Serbisë, Komisioni thotë se Beogradi duhet të forcojë përpjekjet për të krijuar mjedis për lirinë e shprehjes, veçanërisht në forcimin dhe efikasitetin e sistemit gjyqësor.

Aty po ashtu thuhet qartë se përveç reformave në gjyqësor, një çështje që përcakton ritmin e Beogradit drejt BE-së është procesi i normalizimit të marrëdhënieve me Kosovën, që ndërmjetësohet nga BE-ja që prej vitit 2011.

Raporti i Progresit i vitit 2016 pati ngritur shumë vërejtje për punën e institucioneve të Kosovës. Aty u patën ngritur shqetësime në lidhje me përplasjet e vazhdueshme në Kosovë mes të partive politike në pushtet dhe opozitë.

 

Interesante