Droutsas flet në Prishtinë se mendimi i Greqisë për Kosovën nuk ka ndryshuar

“Ka ardhur momenti që Greqia edhe formalisht ta njohë Republikën e Kosovës, sepse ky do të ishte një gur shumë i rëndësishëm për paqen dhe stabilitetin e qëndrueshëm në rajon”, tha Presidenti i Republikës së Kosovës Fatmir Sejdiu gjatë një takimi që pati sot me ministrin e Punëve të Jashtme të Greqisë, Dimitris Droutsas. “Greqia, që nga Antika e këtej, është një shembull model i demokracisë, duke dhënë aq shumë për kulturën dhe trashëgiminë e përbashkët jo vetëm të Evropës, po të mbarë njerëzimit”, vlerësoi Presidenti Sejdiu.

Ndërkaq, Dimitris Droutsas, ministër i Punëve të Jashtme i Greqisë tha se Greqia dëshiron të promovojë frymën e bashkëpunimit në rajon. “Greqia beson fuqishëm në perspektivën e përbashkët evropiane, e cila do të krijojë paqe dhe stabilitet të përhershëm për të gjitha vendet e rajonit”, tha ministri Droustas. Sa i përket mendimit këshillëdhënës të GJND-së, ai pohoi se Greqia i jep rëndësi të madhe këtij mendimi dhe është duke e studiuar atë me kujdes.

Duke ritheksuar faktin se Kosova e konsideron Greqinë dhe popullin e saj si një vend mik dhe fqinj historik, Presidenti Sejdiu pohoi se Republika e Kosovës është shumë e përkushtuar që t’i thellojë edhe më tej marrëdhëniet e mira që tashmë ekzistojnë në mes dy vendeve tona. Duke folur për raportet e sotme, Presidenti Sejdiu e çmoi pjesëmarrjen e trupave ushtarake greke në kuadër të KFOR-it në misionin e ruajtjes së paprekshmërisë së Kosovës dhe lirisë së saj, si dhe kontributin e të gjithë qytetarëve të tjerë të Greqisë në misionet civile në vendin tonë. Gjatë ditës së sotme, z/ministri i Jashtëm i Greqisë Drutsas u takua edhe me kryeministrin Hashim Thaçi për të sjell mesazhin se e ardhmja e rajonin është në familjen evropiane. “Në BE nuk ka qasje të njëjtë, kjo nuk është sekret.

Pozicioni i Greqisë është i njohur. Por, e rëndësishme është se të 27 vendet anëtare pajtohen për një gjë, e ardhmja e vendeve të rajonit është në BE. Greqia i përket atyre shteteve që e promovuan këtë gjë”, theksoi Droutsas”. Këtë mesazh ai ia përcolli kryeministrit Hashim Thaçi, me të cilin foli edhe për dialogut mes shteteve të rajonit. Ky i fundit shprehu gatishmëri për këtë. Pavarësisht se Greqia nuk e ka njohur Kosovën, Thaçi falënderoi këtë shtet për të gjitha angazhimet në vendin tonë. Por, duket se as opinioni i GJND-së nuk ia ka ndërruar mendimin grekëve.

Droutsas, nuk dha shenja se njohja e shtetit më të ri në botë mund të ndodhë shpejt. “Është një vendim që çdo shtet e merr vetë. Mendoj se kjo çështje nuk është objektiv kryesor. Kryesorja është të shohim nga e ardhmja, ajo është në BE. Në këtë aspekt, Greqia do të bëjë gjithçka që është e nevojshme që të arrihet ky qëllim”, ka thënë Droutsas.
Lexo më shumë...

Gjashtë të rinjë lëndohen në një aksident në Prishtinë

Gjashtë persona janë lënduar në mëngjesin e së shtunës, si pasojë e një aksidenti trafiku që ndodhi në udhëkryqin afër konvikteve në Prishtinë. Të lënduarit janë dërguar për trajtim mjekësor në Qendrën Emergjente në kryeqytet. Sipas mjekëve udhëtarët që kanë qenë në vetura mercedes dhe kadet të cilët janë ndeshur mes vete nuk kanë marrë lëndime të rënda, dhe pas trajtimit mjekësor më pas janë dërguar në shtëpi. Pacientët ne Qendrën Emergjente nuk deshën të deklarohen para kamerave të televizionit tonë, mirëpo thanë se kishin qenë duke ardhur nga qyteti i Mitrovicës, në Universitetin e Prishtinës për t’iu nënshtruar një provimi. Ndërkaq zëdhënësi i policisë Arbër Beka përmes telefonit i tha Klan Kosovës se lëndimi i personave ndodhi për shkak të mos përdorimit të rripit të sigurisë. Beka tha se me rastin është duke u marrë njësia e trafikut i stacionit policor.  Lexo më shumë...

New York, Ministri Hyseni bën ende thirrje për njohje të Kosovës

Ministri i Jashtëm, Skënder Hyseni, vazhdon të bëjë thirrje për njohjen e Kosovës nga vendet të cilat nuk e kanë bërë këtë.
Në vazhdën e takimeve që po zhvillon në New York, është takuar me ambasadorin e Francës dhe Italisë, ku u diskutua për hapat dhe veprimet që do të ndërmerren në periudhën pas mendimit të GJND-së.
“Këto biseda janë zhvilluar në kuadër të takimeve që Ministri është duke pasur me partnerët e shteteve të Quint-it, e që kanë për qëllim bashkërendimin e ngushtë të veprimeve pas mendimit këshillëdhënës të Gjykatës Ndërkombëtare të Drejtësisë”, thuhet në njoftimin për media të kësaj ministrie. Në takimet me ambasadorin francez në OKB, Zherard Arod dhe italianin Xhiani Lorenco Kornado, Kryediplomati kosovar theksoi nevojën dhe rëndësinë e bashkërendimit të veprimit me mbështetësit e pavarësisë.
  Lexo më shumë...

Dimitris Drutsas, BE nuk ka dërguar asnjë rezolutë në OKB

Pritet që sot në Prishtinë të arrijë zv/Ministri i Punëve të Jashtme të Greqisë Dimitris Drutsas i cili ka filluar turin e tij për nxitjen e dialogut Prishtinë Beograd pas mendimit të Gjykatës Ndërkombëtare të Drejtësisë dhe procedimin e saj në Asamblenë e Përgjithshme të OKB-së. Para mbërritjes së tij në Kosovë Drutsas, është takuar në orët e vona të së premtes me Presidentin serb Boris Tadiq dhe Ministrin e Punëve të Jashtme Vuk Jeremiq. Ai ka thënë në Beograd se Bashkimi Evropian nuk ka dërguar në OKB një rezolutë, por ka theksuar se vendet antare po koordinojnë një mendim të përbashkët në lidhje me këtë çështje. Diplomati Drutsas i cili përfaqëson Greqinë, vendin që zëshëm ka theksuar se nuk e njeh pavarësinë e Kosovës, ka thënë se qëndrimi i vendit të tij nuk do të ndryshojë, karshi shtetit më të ri në botë.
  Lexo më shumë...

Kërkohet lirimi i Ramush Haradinajt

Me moton “Nderi, Krenaria, Dinjiteti” dhe me fotografi të liderit të AAK-së, Ramush Haradinaj, të premten në pushimin e mesditës zyrtarët komunalë dhe punëtorët e administratës, pasi kanë bërë homazhe dhe kanë vënë kurora lulesh tek varrezat e dëshmorëve, të veshur në të bardha kanë defiluar rrugëve të qytetit duke shprehur pakënaqësinë dhe indinjatën lidhur me vendimin e Dhomës së Apelit të TPI-së për rigjykim të ish- kryeministrit, Ramush Haradinaj.

Protestuesit përmes një marshi të qetë, gjithnjë në nderim të sakrificës të luftës së shenjtë dhe të drejtë të UÇK-së, kanë kërkuar lirimin e Haradinajt, duke besuar në pafajësinë e tij aq me parë kur po nga kjo gjykatë me vendim
unanim para dy viteve ishte liruar.

“Ne besojmë në pafajësinë e liderit dhe ish- kryeministrit të Kosovës, sepse ajo ishte dëshmuar me prova dhe fakte nga Haradinaj, i cili me vendim unanim të kësaj gjykate ishte liruar”, ka thënë kryetari i komunës së Deçanit, Rasim Selmanaj, i cili shprehu habinë me praktikat e kësaj gjykate që nuk ka ndodhë ndonjëherë të këtë rigjykime si në rastin Haradinajt.

Megjithatë, kryetari Selmanaj, është shprehur se “beson në drejtësinë ndërkombëtare, sikurse beson thellë edhe në pafajësinë e Haradinajt, ndërkohë pret lirimin e tij të shpejtë.

“Pafajësia e Haradinajt dhe lufta e drejtë e UÇK-së është dëshmuar botërisht”, ka nënvizuar ai, duke vlerësuar kontributin dhe sakrificën e tij dhe të familjes, gjatë luftës çlirimtare dhe gjatë ndërtimit të shtetit të pavarur të Kosovës.

Ndërsa punëtori me i vjetër i kësaj komune Zeqir Ramosaj, i cili kishte dal të protestonte thotë se është ndier i shokuar me vendimin e Dhomës së Apelit, sikurse kështu janë ndier edhe të gjithë qytetarët e kësaj komune.

“Nuk kam dëgjuar për një rast të tillë prej se është themeluar gjykata e
drejtësisë botërore, ndaj edhe besoj në lirimin e shpejt të Haradinajt, sepse pafajësia e tij dhe lufta e drejtë e UÇK-së, para dy vitesh kishin marr verdiktin e kësaj gjykate”, ka thënë ai.

Në mesin e protestuesve e cila kishte veshur bluzën me foton e Ramushit dhe mbishkrimin “Nderi,krenaria, dinjitetit”, ishte edhe Vesna Spaleviqi, nga komuniteti serb, që punon si zyrtare në Zyrën Komunale të Komuniteteve.

“Nuk gjejë dot fjalë për të vlerësuar figurën e Ramushit, nga i cili personalisht gjithmonë kam, gjetur përkrahjen e tij. Unë dhe shoqëria ime që jeton në Pejë, jemi kthyer në Kosovë në saje të garancive të tij, dhe tani më shumë se dy vjet punojmë dhe shëtisim të lira”, është shprehur ajo, duke kërkuar lirimin e Haradinajt.

Gjatë gjithë kohës sa ka zgjatur protesta e qetë dhe dinjitoze, të cilës iu kanë bashkuar edhe disa qytetarë dhe mbi një gjysmë ore, rruga kryesore në Deçan ka qëndruar e bllokuar. Ndërkohë ky manifestim është vëzhguar nga ushtar të KFOR-it. Ndryshe, organizatoret kanë thënë se manifestime të tilla, me kërkesë për lirimin sa më të shpejtë të ish-kryeministrit të Kosovës dhe liderit të AAK-së, Ramush Haradinaj, do të mbahen edhe në ditët në vijim, në Deçan dhe anembanë Kosovës.  Lexo më shumë...